Vıse-premer – ulttyq ekonomıka mınıstri Serik Jumanǵarın Úkimet, Ulttyq bank jáne Qarjy naryǵyn retteý agenttiginiń 2026–2028 jyldarǵa arnalǵan makroekonomıkalyq turaqtandyrý jáne halyqtyń ál-aýqatyn jaqsartýǵa baǵyttalǵan birlesken jańartylǵan baǵdarlamasyn tanystyrdy, dep habarlaıdy aqshamnews.kz
Serik Jumanǵarınniń aıtýynsha, bul baǵdarlama qazaqstandyqtardyń naqty tabysyn arttyrýǵa kómektesedi.
Óndiristiń ósýi esebinen tabysty ulǵaıtý
Jumanǵarın baǵdarlamanyń basym baǵyty – ekonomıkanyń sapaly ári turaqty ósýin qamtamasyz etý jáne ınflásıany tómendetý arqyly halyqtyń naqty tabysyn kóterý ekenin atap ótti. Ol Qazaqstan ekonomıkasynyń ósip jatqanyn eske saldy. Máselen, 2025 jyldyń 10 aıynda ekonomıka 6,4% artqan, naqty sektordaǵy ósim 8,2%, qyzmet kórsetý salasy 5,3% bolǵan.
Jetistikke baǵa berýdiń jańa tásilderi
2026–2028 jyldary Úkimet ekonomıkany jyl saıyn 5% deńgeıinde ulǵaıtýdy josparlap otyr, alaıda basty nazar JİÓ qurylymyndaǵy salalardyń jaı ǵana ósýine emes. Ósimniń qamtamasyz etilýinde adam kapıtaly, negizgi kapıtal, tabıǵı resýrstar, eńbek ónimdiligi jáne tehnologıalar sıaqty mańyzdy faktorlardyń úlesi eskeriletin bolady.
– Osyǵan baılanysty áleýetti JİÓ-ge qaraı ekonomıkalyq ósimdi taldap bólý ózekti bola túsedi. Ósimniń eń mańyzdy faktory – «jıyntyq ónimdilik». Ol ekonomıkalyq ónim jasaý barysynda eńbek pen kapıtal sıaqty óndiris faktorlaryn qanshalyqty tıimdi paıdalanǵanyn kórsetedi, – dedi Serik Jumanǵarın.
Onyń aıtýynsha, 2001–2024 jyldar aralyǵynda osy faktordyń ekonomıka ósimine qosqan ortasha úlesi 2,4 paıyzdyq pýnktti quraǵan. Kapıtaldyń úlesi ortasha eseppen 1,8 p.p., al eńbektiń úlesi – 1,3 p.p.
– Basymdyq uzaq merzimdi óndiristik áleýetti eńbek ónimdiligin arttyrý, tıimdi jumyspen qamtýdy kúsheıtý jáne kapıtaldyń tehnologıalyq deńgeıin joǵarylatý arqyly ulǵaıtý bolady. Bul óz kezeginde JİÓ ósimi men jalaqy ósimi arasyndaǵy aıyrmashylyqty birtindep azaıtady, – dep senedi vıse-premer Jumanǵarın.
Ol jańa tásilderdiń arqasynda qazaqstandyqtardyń naqty tabysy ınflásıadan 2–3% jyldam ósetinin aıtty.