Qazaqstandyq kıbersportshy, brazılıyalyq FURIA komandasynda óner kórsetetín Danıl molodoy Golubenko HLTV nūsqasy boıynsha CS2-den "Jyldyń úzdík jańalyǵy" atandy, - dep habarlaıdy aqshamnews.kz tílshísí.
Oqıǵa HLTV Awards syılyǵyn tabystau rásímínde boldy - būl CS2 boıynsha byltyrdyń qorytyndysy shyǵatyn, túrlí marapattar beríletín jyl saıynǵy rásím.
FURIA-nyń jarqyn jańalyǵy Danıl molodoy Golubenko "Jyldyń jańalyǵy" júldesín Belgradta senbíde ótken HLTV Awards keshínde ıelendí. Qazaqstandyq AWP-mergen būl atalymda Falcons sapyndaǵy Maksım kyousuke Lukındí jáne Natus Vincere oıynshysy Drın makazze Shakırıdí basyp ozdy.
Qazaqstandyq oıynshy sahnaǵa ūlttyq shapanmen shyǵyp, ózge komandalar oıynshylary otyrǵan zaldan qoshemetke bólendí.
"Búgín - meníń tuǵan kúním. Sením artqandaryńyzǵa raqmet, barlyq jaǵynan qoldau kórsetíp júrgen FURIA-ǵa raqmet. Qoldaularyńyz úshín alǵys aıtamyn. Men CS-tí jaqsy kóremín. Alǵa, Qazaqstan!" - dedí Golubenko.
Aıta keteıík, Golubenkonyń álemdegí úzdík oıynshylar qataryna enuíne yqpal etken oqıǵalardyń bírí Astanada bolǵan. Qazaqstan astanasynda Danıl FURIA qūramymen PGL serıyasyndaǵy eń írí turnırlerdíń bírínde jartylaı fınalǵa deıín jetken.
Danıldíń komandamen bírge jetken ózge jetístíkterí: Thunderpick World Championship 2025, Blast Rivals 2025 Season 2, FISSURE Playground 2, sondaı-aq IEM Chengdu turnırleríndegí jeńíster. Keıíngí ekeuínde molodoy turnırdíń eń úzdík oıynshysy dep tanylǵan.