Qazaqstanda jekemenshík mektepterde memlekettík bílím beru tapsyrystaryn ornalastyrudyń jańa tetígíne baılanysty qanatqaqty joba íske qosyldy.
Oqu-aǵartu mınıstrlígí men oblystardyń, Almaty, Astana jáne Shymkent qalalary ákímdíkteríníń bírlesken būıryǵymen «2025-2026 oqu jylyna arnalǵan jekemenshík bílím beru mekemelerínde orta bílím beruge baılanysty memlekettík bílím beru tapsyrystaryn ornalastyrudyń jańa tetígí» pılottyq jobasy bekítíldí, - dep habarlaıdy Aqshamnews.kz.
Atalǵan joba qarjylandyrudyń ashyqtyǵyn arttyruǵa, memlekettík-jekeshelík áríptestíktí damytuǵa jáne barlyq balany sapaly bílímmen qamtamasyz etuge baǵyttalǵan.
Keıíngí jyldary elímízde jekemenshík mektepterdíń sany shamamen myńǵa juyqtap qaldy. Bílím salasyndaǵy jeke bıznestíń ūlǵayuy jaqsy úrdís. Alaıda qazír memlekettík tapsyrysty alu tártíbí jańartu men jetíldírudí qajet etedí.
Júrgízílgen taldau jūmystarynyń nátıjesínde jekemenshík mektepterdegí oqushylardy esepke alu men qarjylandyru boıynsha sáıkessízdíkter anyqtaldy. Ūlttyq bílím beru derekqorynda memleket esebínen qarjylandyrylatyn oqu ornynda tírkelgen balalardyń ís júzínde múldem basqa mektepte oqıtyny belgílí boldy. Al jekelegen óńírlerde keıbír mektepter oqudan shyǵyp ketken oqushylar úshín de aqsha alyp otyrǵan. Sondaı-aq bílím beru qyzmetíne qatysy joq memlekettík satyp alu júıesínde tírkelgen ūıymdar anyqtaldy. Mūnyń barlyǵy júıege reforma qajet ekenín baıqatyp otyr.
Túıítkíldí máselelerdí sheshu maqsatynda Qarjy mınıstrlígíne qarasty «Aqparattyq-esepteu ortalyǵy» AQ jańa aqparattyq júıení ázírledí. Atalǵan tehnologıya E-Qazyna.kz platformasyna engízílgen jáne paıdalanushylardyń jūmysyn jeńíldetumen qatar būl derekterdíń dūrystyǵyn baqylaudy kúsheıtedí. Júıede oqushylardyń sany men kontıngentí, rūqsat qūjattarynyń bar-joǵy avtomatty túrde tekserílíp, bílím beru salasyndaǵy aqparattyq júıelermen bírtūtas bolady.
Bíryńǵaı ákímshílík basqarudy qamtamasyz etu úshín «Qarjy ortalyǵy» AQ Qarjy mınıstrlígíníń qaramaǵyna beríldí. Ortalyq qanatqaqty jobanyń operatory retínde ūıymdastyru-ádístemelík qoldaudy júzege asyryp, qatysushylarǵa keńes beru, monıtorıng júrgízu, qabyldanǵan aktílerge sáıkes tólem júrgízu qyzmetterín atqarady.
Osy jobany íske asyrudaǵy negízgí ról jergílíktí atqarushy organdarǵa – bílím beru basqarmalaryna júktelíp otyr, olar memlekettík tapsyrystardy ornalastyryp, qorytyndy esepterdí bekítedí, sondaı-aq kelísímsharttar jasap, www.e-Qazyna.kz veb-portaly arqyly kórsetílgen qyzmetter turaly aktílerdí qabyldaıdy.
Kelesí kezeńde būl júıege bílím beru salasyndaǵy basqa da memlekettík qarjylandyru qūraldaryn – granttardy, shákírtaqylardy, jataqhanada oryndarmen qamtamasyz etu jáne basqa da qoldau túrlerín bíríktíru kózdelgen.
Jańa aqparat júıesí 12 qarashada íske qosyldy. Bílím beru qyzmetteríne tsıfrlandyrudy engízu – memlekettík satyp alular qyzmetíndegí byudjet qarajatynyń ashyqtyǵyn arttyryp, túsíníktí etudí kózdeıdí jáne uaqtyly, oryndy qarjylandyrudyń ákímshílík qadaǵalauyn qamtamasyz etedí. Būl jańashyldyq byudjetke túsetín júktemení azaıtyp, básekelestíktí arttyrady jáne bílím beru salasyna jeke ınvestıtsıyany kóbírek tartuǵa áser etedí.