2024 jylǵy derekterge sáıkes, Almatyda 500-den astam káýaphana, 417 monsha kesheni (zańdy tulǵalar) jáne jekemenshik sektorda 12 myńnan astam monsha jumys istegen, - dep habarlaıdy Aqshamnews.kz.
Monshalardan bólinetin shyǵaryndylar kólemi jylyna shamamen 4 myń tonna, onyń ishinde jeke sektordaǵy monshalardan shyǵatyn qaldyqtar qoǵamdyq monshalarǵa qaraǵanda 2 ese kóp. Bul týraly Almaty qalasynyń Ekologıa jáne qorshaǵan ortany qorǵaý basqarmasynyń sarapshysy Nazıa Aýhınova aıtty.
«Shaǵyn jáne orta bıznes ókilderi qyzmetiniń turaqty bolýy úshin ekologıalyq shekteýlerdi saqtap, shyǵaryndylardyń turaqty kózderine súzgiler ornatý boıynsha sanıtarlyq-epıdemıologıalyq talaptardy oryndaý qajet ekenin túsinýge tıis. Qatty otyn jaǵatyn shaǵyn ǵana káýaphana nemese monsha mańaıdaǵy aýa keńistigin ondaǵan, tipti júzdegen metrge deıin lastap, eń aldymen sol mańdaǵy turǵyndarǵa qolaısyzdyq týdyrady. Sondyqtan eń tıimdi qoljetimdi tehnologıalarǵa kóshý, ıaǵnı gaz otynyna ne elektrge aýysý jáne tıimdi súzgiler ornatý qajet», – dedi ol.
Eske salaıyq, búgin máslıhat depýtattary Almaty qalasynyń atmosferalyq aýasyn qorǵaý boıynsha jańa erejelerdi bekitti. Bul erejeler Qazaqstanda alǵash ret engizilip otyr jáne megapolıs erekshelikterin eskere otyryp, lastanýdyń negizgi kózderin retteıtin biryńǵaı keshendi tetik qalyptastyrady.