Elímízde er adamdar da dekrettík demalysqa shyǵa alady. Būl múmkíndík zań júzínde 2008 jyldan berí qarastyrylǵan. "Bala kútímí - tek ananyń míndetí" degen qaǵıdany būzǵan azamattar sany qansha? Olar dekrettík járdemaqy ala ma? Dekretke shyqqan ákelerdíń ómírí jaıly Aqshamnews.kz tílshísí materıalda tarqatady.
Elaman Qonysbek - dekretke shyqqan áke. Ol Astana qalasyndaǵy áuejaıda áue dıspetcherí bolyp jūmys ísteıdí. Jūbaıy Ásem ekeuí Káusar esímdí qyzdyń ata-anasy. Elaman Qonysbek jūbaıynyń jūmysyna baılanysty AQSh-taǵy, Boston qalasyna kóshíp, qyzy - Káusardyń bír jarym jasynan bastap bala kútímímen aınalysyp otyr. Al kelínshegí Ásem - Garvard medıtsınalyq mektebínde ǵylymı qyzmetker árí postdoktoranturada oquyn jalǵastyryp jatyr.
"Dekret - demalys emes"
Elaman myrza dekrettík demalysqa shyǵu turaly sheshímdí qalaı qabyldaǵany jaıly áńgímelep berdí. Onyń sózínshe, "dekrettík demalysty" demalys dep atauǵa kelmeıdí. Ol bala kútímímen otyrǵan áıelderdí erekshe túsíngenín aıtty.
"AQSh-tan jūbaıymnyń jūmysy boıynsha shaqyrtu túsíp, bas tartuǵa bolmaıtynyn túsíndím. Oǵan qoldau bíldíríp, "qyzymyzdy ózím qaraımyn" dep, dekrettík demalys aldym. Negízí dekrettík demalysty, "demalys" dep atauǵa kelmeıdí. Bala kútímí de úlken jūmys eken. Kúní boıy bala baǵyp otyrǵan áıelderdíń ómírín endí túsíníp jatyrmyn. Būl naǵyz - erlík!" deıdí Elaman myrza.
Dekrettegí ákeníń bír kúní qalaı ótedí?
Elaman myrza dekrettík ómíríníń qalaı ótíp jatqanyn aıtyp berdí. Ol qyzy Káusar ekeuíníń ár kúní bír-bíríne ūqsamaı, erekshe ótetínín aıtty.
"Qyzymyz ekeumíz erte 6-da tūramyz. Tańǵy asymyzdy íshíp, jūbaıymdy jūmysyna shyǵaryp salamyz da tańǵy seruenge ketemíz. Bír kúní kítaphanaǵa, bír kúní kontsertke, bír kúní sayabaqqa baramyz. Mūnda bíz sekíldí bírneshe qazaq otbasy bar. Solarmen áńgíme-dúken qūramyz. Úıge kelíp túskí as daıyndaımyz. Tústen soń demalysqa da uaqyt tabamyz. Al keshke anamyzdy jūmystan kútíp alyp, bárímíz bírge máre-sáre bolyp keshkí as íshemíz" deıdí dekrettegí áke.
Elaman myrzanyń sózínshe AQSh-ta er adamdardyń dekretke shyǵuyn qalypty jaǵdaı retínde qabyldaıdy. Al Qazaqstandaǵy tuysqandary basynda qatty tańǵalǵan.
"Men dekretke shyqqanymdy namys sanamaımyn. Būl ísímdí bír erekshelep maqtan da tūtpaımyn. Sebebí būl jaı ǵana - otbasylyq qoldau. Kez kelgen er adam otbasyna, jaryna qoldau kórsetu kerek" deıdí Elaman myrza.
"AQSh-taǵy bír aılyq balabaqsha qūny - 3000$"
Elaman Qonysbek Amerıkada bala tárbıeleu, jalpy balany ómírge ákelu úlken jauapkershílík, árí ońaı ís emes ekenín aıtty.
"AQSh-ta balany ómírge ákelu ońaı ís emes. Eresek jandardyń da shyǵyny ońaı qarjy emes. Al balabaqshaǵa balańdy bergíń kelse aı saıyn 2500-3000 dollar tóleuíń kerek. Memlekettík balabaqshalar da bar. Bíraq ol jaqta da kezek júıesí bar. Bíz de kezekke tūryp qoıdyq, bíraq ol kezek qyzymyz mektep bítírgende bír-aq keluí múmkín. Óıtkení memlekettík balabaqshadan úmíttenetínder kóp" deıdí Elaman myrza.
"Otbasynda eń mańyzdysy - mahabbat"
Dekrettegí áke otbasy úshín ekí adam da bírge at salysu kerektígín, berík otbasynyń negízgí qaǵıdalary jaıly oıyn aıtty. Ol dekrettík ómír bastapqyda qıynǵa soqqanyn, qıyndyqtardy qalaı eńsergenín áńgímeledí.
"Bala tárbıesí - tek áıeldíń júktemesí emes. Bala ortaq bolǵandyqtan, tárbıe de ortaq boluy kerek. Dekrettík ómír árıne bastapqyda qıyn boldy. Dese de adamnyń shyn nıetí bolsa úırenuge bolady. Sebebí, otbasyndaǵy eń mańyzdy nárse - mahabbat. Mahabbat bolsa bárín jeńuge bolady. Jūbaıym ekeumízdíń aramyzda túsíníspeushílíkter bolmaıdy emes, bolyp tūrady. Tek ondaı jaǵdaılarda sabyrmen, "men, sen" dep bólmeı, asyqpaı, ashyq sóılesíp eńseruge bolady" deıdí Elaman myrza.
