Keshe Almaty muzeıleríníń esígí túngí saǵat 24.00-ge deıín aıqara ashyq boldy., – dep habarlaıdy aqshamnews.kz tílshísí.
Yaǵnı qala jūrtshylyǵy men meımandary 18 mamyr – Halyqaralyq muzeıler kúníne oraı ūıymdastyrylǵan dástúrlí «Muzeı túní – 2026» mádenı aktsıyasyna atsalysty.
Iá, keshe túnde qala kóshelerín mádenıet pen ónerdíń jyly lebí terbep, muzeılerdíń shamdary tún ortasyna deıín sónbeı jarqyrap tūrdy. «Muzeı túní» mádenı ís-shara ǵana emes, ótken men búgíndí jalǵaǵan ruhanı keshke aınaldy.
Máselen, Almaty muzeıínde kıno jáne teatr aktrısasy, Qazaqstannyń halyq ártísí Meruert Ótekeshovanyń 75 jyldyǵyna oraı «Qazaq kınosynyń jauhary – Qyz Jíbek» kórmesí ashyldy. Onda «Qyz Jíbek» fılmíníń akterlerí Qūman Tastanbekov, Asanálí Áshímov jáne fılm avtorlary Sūltan Qojyqov, Gúlfaırus Ismaıylova, Ǵabıt Músírepov, Nūrǵısa Tílendıev syndy tūlǵalardyń da jeke zattary ūsynyldy.
Multımedıalyq dástúrlí muzyka ortalyǵy da ótken men búgíndí baılanystyratyn erekshe baǵdarlama daıyndady. Tarıhı tūlǵalar – Dına Nūrpeıísova, Jambyl Jabaev pen Aqan serí beınesínde ótetín teatrlandyrylǵan ekskursıyalar ūıymdastyryldy.
Muzeıler keshínde «Jūldyzdy gıd», «Muzeıge syı» aktsıyalary, qysh būıymdar, beıneleu ónerí, zergerlík būıymdar jasau boıynsha sheberlík saǵattary, balalarǵa arnalǵan akvagrım, pazldar men kvestter aımaǵy, jasandy ıntellekt tehnologıyasymen jabdyqtalǵan fotoaımaqtar jūmys ístedí.
«Almaty keshí» kontserttík baǵdarlamasynda Kalifarniya, Bayan Sulu, «Alashūly» toby, IL Canto kvartetí, «Alatau serílerí», «Sazgen sazy», «Arqaıym», «Parasat» etno-folklorlyq toptary óner kórsettí.
Muzeıler tabaldyryǵyn attaǵan árbír jan tarıhtyń tynysyn sezíníp, ónerdíń únín estígendeı boldy.
Balalardyń shat kúlkísí, jastardyń qyzyǵushylyǵy, úlkenderdíń tebíreníske toly júzderí keshtíń erekshe atmosferasyn aıshyqtaı tústí.
«Muzeı túní» Almatynyń mádenı ómíríne erekshe sán beríp, ruhanı qūndylyqtardyń mańyzyn taǵy bír márte sezíndírdí.
Nūrjamal ÁLÍSh