Jambyl oblysynda polısıa 40 jastaǵy Shý qalasynyń turǵynyn qatygezdikpen óltirý faktisi boıynsha tergeý júrgizip jatyr, dep habarlaıdy Aqshamnews.kz tilshisi KTK arnasyna silteme jasap.
Telearna málimetinshe, áıel birneshe kún boıy týǵandarymen baılanysqa shyqpaǵan. Almatydan kelgen uly anasyn óz páterinde óli kúıinde taýyp alǵan. Marqumnyń denesinde pyshaq jaraqattary bolyp, qatty zaqymdanǵany anyqtalǵan.
Polısıanyń habarlaýynsha, jedel izdestirý sharalarynyń nátıjesinde kúdikti retinde Shýǵa qarasty aýdannyń 35 jastaǵy turǵyny ustaldy. Ol qaza tapqan áıelmen burynnan tanys bolǵany belgili, alaıda qylmystyń sebebi ázirge jarıa etilmeı otyr.
«Polısıa qyzmetkerleri Shý aýdanynyń 35 jastaǵy turǵynyn kúdikti retinde ustap, ýaqytsha ustaý ızolátoryna qamady. Qazirgi ýaqytta qylmysty jan-jaqty, tolyq jáne obektıvti tergeýge, sondaı-aq barlyq mán-jaıdy anyqtaýǵa baǵyttalǵan qajetti tergeý áreketteri júrgizilip jatyr», – dep habarlady polısıa.