Enbek.kz portalynyń málímetínshe, «akusher-gınekolog» mamandyǵy boıynsha 469 bos jūmys ornyna nebárí 100 túıíndemeden keledí, – dep habarlaıdy aqshamnews.kz tílshísí.
Tízímge engízílgen mamandyqtar boıynsha sheteldík joǵary bílíktí kadrlarǵa Qazaqstanda tūraqty tūruǵa rūqsat alu múmkíndígí beríledí. Būl tetík basym baǵyttarǵa qajettí mamandardy tartudy kózdeıdí.
Eńbek jáne halyqty áleumettík qorǵau mınıstrlígíníń aqparattyq júıeleríndegí derekterge sáıkes, 2026 jyldyń basynan berí bírqatar mamandyqtar boıynsha kadr tapshylyǵy saqtalyp otyr.
Máselen, Enbek.kz portalynyń málímetínshe, «akusher-gınekolog» mamandyǵy boıynsha 469 bos jūmys ornyna nebárí 100 túıíndemeden keledí. «Pedıatr» mamandyǵy – 448 vakansıyaǵa 139 túıíndeme, al «anestezıolog-reanımatolog» boıynsha 300 bos orynǵa 75 túıíndeme ǵana tírkelgen. Sonymen qatar onkolog, neonatolog jáne endokrınolog mamandaryna da sūranys joǵary.
Būǵan qosa, aqparattyq tehnologıyalar salasyndaǵy mamandarǵa da qajettílík artyp otyr. Atap aıtqanda, qoldanbaly baǵdarlamashylar (509 vakansıya), grafıkalyq dızaınerler (355 bos jūmys orny) sūranysqa ıe.
Eńbek sharttaryn esepke aludyń bíryńǵaı júıesíníń derekteríne sáıkes, sūranysqa ıe mamandyqtar boıynsha 45 myńnan astam eńbek sharty jasalǵan. Onyń íshínde baǵdarlamalyq qamtamasyz etu ázírleushílerí shamamen 8 myń, akusher-gınekologter – 4,6 myń, pedıatrlar – 4,1 myń jáne qoldanbaly baǵdarlamashylar 3,5 myń eńbek shartyn qūraıdy.
Sonymen qatar sheteldík jūmyskerlermen 55 eńbek sharty rásímdelgen. Olardyń basym bólígí «avtomattandyru ınjenerí» mamandyǵyna tıesílí.
Salystyrmaly túrde alǵanda, 2025 jyly Enbek.kz portalynda sūranysqa ıe mamandyqtar boıynsha 9 myńnan astam bos jūmys orny jarıyalanǵan. Medıtsına salasynyń mamandary dástúrlí túrde joǵary sūranysqa ıe bolyp otyr.
Jalpy, keltírílgen derekter íshkí eńbek naryǵy sūranysqa ıe mamandyqtardyń basym bólígí boıynsha qajettílíktí qamtamasyz etíp otyrǵanyn kórsetedí. Degenmen densaulyq saqtau salasynda kadr tapshylyǵy álí de ózektí bolyp qalyp otyr.