Semeıde 19 jastaǵy tūrǵyny alayaqtyq shemaǵa tartylǵan. Qazír polıtsıya onyń óz shotyn qylmystyq maqsatta paıdalanylǵanyn bílgen-bílmegenín anyqtap jatyr, - dep habarlaıdy aqshamnews.kz Abaı oblystyq polıtsıya departamentíne sílteme jasap.
Vedomstvonyń málímetínshe, 2025 jylǵy 15 jeltoqsanda Semeı qalalyq polıtsıya bólímíne Astanadan bank shotyn tanymaıtyn adamdarǵa bergení úshín materıal joldanǵan. Zardap shegushí – elorda tūrǵynyna keltírílgen jalpy shyǵyn kólemí 9 mln teńge bolǵan.
Tergeu barysynda alayaqtyq jolmen jymqyrylǵan qarajat úshínshí tūlǵanyń esepshotyna audarylǵany anyqtalǵan. Onyń íshínde 400 myń teńge Semeıdíń 19 jastaǵy tūrǵynynyń atyna rásímdelgen shotqa túsken.
Jígíttíń aıtuynsha, qazanda oǵan ınternet arqyly tabys tabu ūsynylǵan. Onlaın-platformaǵa tírkelíp, messendjer arqyly baılanysqan belgísíz adamdar «jūmys» retínde onyń jeke derekterín sūraǵan. Nátıjesínde, olar jígíttíń esepshotyn qylmystyq jolmen alynǵan aqshany qabyldau úshín paıdalanǵan.
Qazír polıtsıya jígíttíń alayaqtyq shemaǵa ádeıí qatysqan-qatyspaǵanyn anyqtap jatyr. Abaı oblystyq polıtsıya departamentí bank kartasyn, shot derekterín, qosymshalarǵa qoljetímdílíktí nemese jeke málímetterdí bógde adamdarǵa beru – zańsyz áreket ekenín eskerttí. Mūndaı tūlǵalar alayaqtardyń aqshasyn ótkízushí dropper retínde tanylyp, zań aldynda jauapkershílíkke tartylady.