Konstıtutsıyada halyqtyń memlekettík bılíktíń jalǵyz kózí ǵana emes, sonymen bírge egemendíktíń jalǵyz tasymaldaushysy ekendígí turaly erejení bekítu konstıtutsıyalyq júıeníń íshkí logıkalyq tūtastyǵyn qamtamasyz etu úshín, sondaı-aq qoǵamdyq bılíktíń tabıǵatyn túsínudegí būrmalanulardyń aldyn alu úshín táuelsíz jáne túbegeılí mánge ıe.
«Halyq – memlekettík bılíktíń qaınar kózí» formulasy bılíktíń paıda bolu jáne zańdastyru mehanızmín kórsetedí, bíraq ózí egemendíktíń qoǵamdyq bılíktíń joǵary, bastapqy jáne ajyramas qasıetí retínde tıesílígí turaly máselení ashpaıdy.
Egemendík ózíníń qūqyqtyq tabıǵaty jaǵynan memlekettík bılíktí júzege asyru faktísímen ǵana shektelmeıdí. Būl memlekettíń ókílettíkterí, memlekettík bılíktíń qūrylymy jáne ony júzege asyrudyń shegí tuyndaıtyn bastapqy jáne qūryltaı sapasyn bíldíredí.
Sondyqtan egemendíktíń ıesí onyń negízínde qūrylǵan subektílermen sáıkes kele almaıdy. Memleket pen onyń organdary ózderíníń egemendígíne ıe emes, tek halyqtyń atynan qabyldanǵan Konstıtutsıyada belgílengen shekterde berílgen egemendík ókílettíkterín júzege asyrady.
7. «Respublıkalyq referendumnan» «jalpyhalyqtyq referendumǵa» degen sózder ózgertíldí.
Referendumdar eń mańyzdy máseleler boıynsha ótkízíluí tıís. Sondyqtan referendumnyń atauynda memlekettík qūrylym nysanyna emes, referendum ótkízu talabyn aıqyndaıtyn halyqtyń bírlígíne basa nazar audaru kerek.
8. Azamattarǵa jańa míndetter júkteıtín nemese olardyń jaǵdaıyn nasharlatatyn zańdardyń kerí kúshí joq ekendígí naqty anyqtalǵan. Sondaı-aq, jauapkershílíktí belgíleıtín nemese kúsheıtetín zańdar kerí kúshke ıe emes.
Mūndaı tásíl Zań men tártíp, adamgershílík qaǵıdattaryna sáıkes keledí jáne Ádílettí Qazaqstan ıdeyasyna jauap beredí.
9. Jekelegen óńírlerde arnaıy qūqyqtyq rejımdí belgíleu múmkíndígín konstıtutsıyalyq bekítu úshín jedeldetílgen ekonomıkalyq damu maqsatynda kelesí norma bekítíledí:
«Qazaqstan Respublıkasynyń jekelegen óńírlerín jedel ekonomıkalyq damytu maqsatynda konstıtutsıyalyq zańdarǵa sáıkes qarjy salasynda arnaıy qūqyqtyq rejım nemese «jedeldetílgen damu qalalary» arnaıy qūqyqtyq rejımí belgílenuí múmkín. Atalǵan arnaıy qūqyqtyq rejımder memlekettík basqarudyń, sot júıesíníń jūmys ísteuíníń erekshelíkterín kózdeuí múmkín.»
Ūsynylyp otyrǵan norma tūraqty jáne boljanatyn qūqyqtyq negízdí qalyptastyruǵa baǵyttalǵan, onyń sheńberínde qatań belgílengen jáne baqylanatyn shekterde (AHQO jáne Alatau) arnaıy qūqyqtyq rejımderdí belgíleuge jol beríledí.
10. «Sheteldík dínı bírlestíkterdíń respublıka aumaǵyndaǵy qyzmetí, sondaı-aq sheteldík dínı ortalyqtardyń Respublıkadaǵy dínı bírlestíkterdíń basshylaryn taǵaıyndauy Respublıkanyń tıístí memlekettík organdarymen kelísím boıynsha júzege asyrylady» degen artyq norma retínde alyp tastaldy.
11. «Shet memleketterden, halyqaralyq jáne sheteldík zańdy tūlǵalardan, shetel azamattarynan jáne azamattyǵy joq adamdardan alynatyn kommertsıyalyq emes ūıymdardyń aqshalaı qarajattary men aktıvteríníń qozǵalysy turaly aqparat Qazaqstan Respublıkasynyń zańdaryna sáıkes ashyq jáne qoljetímdí boluy tıís» degen norma engízíldí.
Tıístí normany bekítudíń maqsaty konstıtutsıyalyq deńgeıde íshkí memlekettík protsesterge jasyryn sheteldík yqpal etuge jol bermeu, qoǵamnyń kommertsıyalyq emes sektorǵa degen senímín qamtamasyz etu, sondaı-aq azamattardy óz píkírín qalyptastyru úshín qajettí aqparatpen qamtamasyz etu bolyp tabylady.
