Proporsıonaldy júıe boıynsha saılanatyn bir palataly Parlamentke kóshý Qazaqstannyń saıası júıesin damytýdyń qısyndy jalǵasy bolyp tabylady. Bul týraly Májilis depýtaty Azat Perýashev Konstıtýsıalyq reforma jónindegi komısıanyń úshinshi otyrysynda málimdedi.
Ol óziniń saıası prosesterge qatysý tájirıbesi negizinde «Aq jol» demokratıalyq partıasy Memleket Basshysynyń bir palataly Parlamentke kóshý jónindegi bastamasyna nyq qoldaý bildirgenin eske saldy.
Azat Perýashevtyń aıtýynsha, eki palataly Parlament – bul federaldyq memlekettik qurylym ınstıtýty, onda Senattyń mindeti –federasıa sýbektileriniń zańnamasyn usyný jáne úılestirý.
«Qazaqstan biryńǵaı zańdary men erejeleri bar ýnıtarlyq memleket bolyp tabylady. Biz Shemonaıhadan Fort- Shevchenkoǵa deıin, Beskólden Shardaraǵa deıingi ártúrli aımaqtardaǵy adamdardyń ómir súrý sapasy men memlekettik qyzmetterge birdeı kepildik berilip, qorǵalýyna umtylamyz. Bul turǵyda óńirler men olardyń turǵyndarynyń múddeleri teń dárejede saqtalýy tıis», - dedi Azat Perýashev.
Ol Memleket basshysy bul baǵytta 2022 jyly qadam jasaǵanyn aıtty: sol kezde zańdardyń qabyldanýy Májilis quqyǵyna jatqyzyldy, al Senatqa zań jobalaryn maquldaý nemese olarǵa usynystar engizý fýnksıasy berildi.
«Sondyqtan Qasym-Jomart Kemeluly Toqaevtyń qazirgi bastamasy Konstıtýsıanyń dáıekti evolúsıasynyń logıkasyn kórsetedi. Sonymen qatar bul bizdiń saıası júıemizdiń jáne onyń ınstıtýttarynyń jetilýin jedeldetedi», – dep atap ótti Azat Perýashev.
Onyń aıtýynsha, búgingi tańda bir palataly Parlamenttiń memlekettik bılik júıesindegi ókilettigin kúsheıtý boıynsha ońtaıly sheshimder ázirlendi.
Sonymen qatar, Konstıtýsıada onyń mártebesin bekite otyryp, Halyq Keńesi joǵary konsýltasıalyq organyn qurý týraly bastama túrli etnostar ókilderiniń bılik júıesine qatysýyn 8 ese keńeıtedi, óńirlerdiń múddelerin bildirýdi bekitedi jáne azamattyq qoǵam kóshbasshylarynyń saıası júıege tartylýyn qamtamasyz etedi.
Partıalyq tizimder boıynsha Parlament depýtattaryn saılaýǵa kóshý bóliginde bul ustanym parlamentarızmniń jınaqtalǵan halyqaralyq tájirıbesin kórsetetinin atap ótti Azat Perýashev.
Onyń pikirinshe, proporsıonaldy júıe saılanbaly organdarda qoǵam múddeleriniń keń ókildigin qamtamasyz etedi, myqty partıalardyń ósýine yqpal etedi jáne saıası praktıkadaǵy eýropalyq trendterge sáıkes keledi.
«İske asyrylyp jatqan konstıtýsıalyq reforma – bul halyqaralyq tájirıbege jáne parlamenttik opozısıanyń kóp jyldyq tájirıbesine súıenetin búkil konstıtýsıalyq júıeniń shyn máninde tereń qaıta jańǵyrýy», – dep atap ótti Azat Perýashev.