Aýyl sharýashylyǵy eńbekkerleriniń ekinshi forýmyna qatysqan Memleket basshysy Qasym-Jomart Toqaev agroónerkásip keshenin qarjylandyrý tásilderin jetildirý keregin aıtty, - dep habarlaıdy Aqshamnews.kz.
"Bıyl aýyl sharýashylyǵyna arnalǵan jeńildetilgen nesıe kólemi el tarıhynda alǵash ret 1 trıllıon teńgeden asty. Bul – osydan 5 jyl burynǵy jaǵdaımen salystyrǵanda 10 ese artyq kórsetkish. Nesıe qoljetimdi bolýy úshin bankterge quzyrly mekeme tarapynan kepildik berý tásili engizildi. Bıyl "Damý" qory 1300 nesıege kepildik berdi. Sóıtip nesıe alýǵa múlki jetkiliksiz kóptegen sharýanyń, ásirese, shaǵyn jáne orta deńgeıdegi fermerlerdiń máselesi oń sheshimin tapty" - dedi Memleket basshysy.
Elimizde óndiriletin tehnıka jeńildetilgen lızıńpen berile bastady. Bul ábden eskirgen tehnıkany jańartýǵa arnalǵan óte tıimdi sheshim boldy.
"Tórt jyl buryn aýyl sharýashylyǵy tehnıkalarynyń 90 paıyzy tozyp turǵan edi. Bul kórsetkish bıyl 70 paıyzǵa deıin tómendedi. Osy baǵyttaǵy jumysty bıznes ókilderimen birlesip, ári qaraı jalǵastyrý qajet. Qazir sharýalar alyp jatqan tehnıkanyń 90 paıyzy Qazaqstanda shyǵarylǵan. Elimizdegi 10 zaýytta osyndaı 19 túrli tehnıka qurastyrylady. Olardyń qatarynda álemge tanymal brendter bar. Jaqynda Amerıka Qurama Shtattaryna jumys saparym kezinde John Deere kompanıasymen birge quny 2,5 mıllıard dollar bolatyn strategıalyq seriktestik týraly kelisimge qol qoıyldy", - dedi Prezıdent.
Prezıdenttiń sózinshe, soǵan sáıkes aldaǵy bes jylda elimizde 3 myńǵa jýyq zamanaýı tehnıka shyǵarylady.