Astanada «Mádenıet jáne ınnovatsıya» respublıkalyq forumy bastaldy, – dep habarlaıdy aqshamnews.kz tílshísí.
Mádenıet jáne óner qyzmetkerlerí kúníne oraı Astanada «Mádenıet jáne ınnovatsıya» respublıkalyq forumy bastaldy. Ís-sharaǵa elímízdíń barlyq óńírínen mádenıet ūıymdarynyń ókílderí, halyqaralyq sarapshylar, bıznes qauymdastyq múshelerí, kreatıvtí ındustrıya jáne tehnologıyalyq kompanıyalardyń mamandary jınaldy.
Forumnyń ashyluynda QR Premer-Mınıstríníń orynbasary – Mádenıet jáne aqparat mınıstrí Aıda Balaevanyń qūttyqtau haty oqyldy. Qūttyqtauda mádenıettíń ūlttyq bíregeılíktí nyǵaıtudaǵy, kreatıvtí ındustrıyany damytudaǵy jáne sala jūmysyna ınnovatsıyalyq tásílderdí engízudíń mańyzy erekshe ekení atap ótíldí.
«Memleket basshysy Qasym-Jomart Toqaev atap ótkendeı, mádenıet – ūlttyń tólqūjaty. Búgínde mádenıet salasy tek ruhanı qūndylyqtardy saqtaushy ǵana emes, sonymen qatar ınnovatsıyalar men kreatıvtí ındustrıyalardyń qozǵaushy kúshíne aınalyp otyr. Osy rette forum baǵdarlamasynyń tsıfrlyq tehnologıyalardy, jasandy ıntellekt qūraldaryn jáne zamanauı basqaru tásílderín meńgeruge baǵyttaluy – uaqyt talabynan tuyndaǵan mańyzdy qadam», – delíngen qūttyqtau hatta.
Forumnyń ashyluy barysynda Qytaı, Úndístan jáne Germanıyadan kelgen halyqaralyq sarapshylar da sóz sóıledí. Olardyń qatarynda Jinbang (Henan) Cultural Tourism Development kompanıyasynyń tóraǵasy Mıss Mın, Story Arts Foundation qorynyń negízín qalaushy Dıpa Kıran, sondaı-aq live entertainment salasyndaǵy halyqaralyq prodyuser árí kreatıvtí jetekshí Artem Badalyan bar.
Spıkerler jobalardy júzege asyru, storıtellıngtí damytu, kópshílík aldynda sóıleu jáne auqymdy shou baǵdarlamalardy ūıymdastyrudyń mańyzy turaly aıtty.
Forumnyń basty erekshelígí – dástúrlí oqytu úlgísínen naqty jobalar ázírleuge negízdelgen tájírıbelík formatqa kóshu.
Alǵashqy kúní «Mádenıet pen bıznes: seríktester men brendterge qyzyqty jobalardy qalaı jasauǵa bolady?» taqyrybynda paneldík sessıya ótkízíldí. Sonymen qatar kítaphana, arhıv, muzeı ísí, mádenı-demalys, teatr jáne kontsert ūıymdaryna arnalǵan jeke sektsıyalar ótude. Qatysushylar úshín ís-sharalardy tehnıkalyq qamtamasyz etu, vızual tehnologıyalar, stsenografıya jáne ózge de tájírıbelík baǵyttar boıynsha sheberlík saǵattary ūıymdastyryldy.
Forumnyń ekínshí kúní tájírıbelík jūmysqa basymdyq beríledí. Qatysushylar zamanauı tsıfrlyq qūraldarmen tanysyp, fasılıtatsıyalyq sessıyalar arqyly mádenı ūıymdarǵa arnalǵan bastamalardy ázírleıdí.
Jıynnyń sońǵy kúnínde komandalar óz jobalaryn sarapshylarǵa tanystyryp, keıín óńírlerde júzege asyrylatyn úzdík jobalar anyqtalady.