“Muzeı túní” mádenı aktsıyasy Almatydaǵy Yqylas atyndaǵy halyq muzykalyq aspaptar muzeıínde de ótíp jatyr, – dep habarlaıdy aqshamnews.kz tílshísí.
Bıylǵy ís-shara muzeıdíń 45 jyldyǵymen tūspa-tūs kelíp, kesh qonaqtaryna auqymdy mádenı-tanymdyq baǵdarlama ūsyndy.
Teatrlandyrylǵan ekskursıyalar ūıymdastyrylyp, Qorqyt, Qūrmanǵazy, Bírjan sal obrazdaryn somdaǵan akterler kúı tartyp, án shyrqady. Muzeı syrtynda aspap jasau, suret salu boıynsha sheberlík sabaqtary óttí. Al sahnada etno-folklorlyq “Sazgen sazy”, “Aqjauyn”, “Parasat”, “Arqaıym” ansamblderí, sondaı-aq Janar Aıjanova, Erbolat Qūdaıbergenov, Erkín Qūdaıbergenov jáne “Alatau serílerí” toby óner kórsettí. Típtí, muzeıge kelushíler jasandy ıntellekt kómegímen ázírlengen arnaıy fotozonada etnografıyalyq jáne álemdík stıldegí beınelermen estelík suretke túsu múmkíndígíne ıe boldy.
Yqylas atyndaǵy halyq muzykalyq aspaptar muzeıíníń bólím jetekshísí Danıyar Janqabaevtyń sózínshe, bıylǵy aktsıyanyń mańyzdy jańalyǵy – muzeı qoryna Roza Baǵlanova men Seken Tūrysbekovtyń dombyrasynyń qabyldanuy. Qūndy jádíger Muzeı túní alǵash ret kópshílík nazaryna ūsynyldy. Sondaı-aq, muzeıdíń 45 jyldyǵyna arnalǵan arhıvtík fotosuretter men qūjattardan qūralǵan arnaıy kórme ūıymdastyryldy.
“Keıíngí jyldary muzeı qorynda qūndy jádígerler sany artyp keledí. Jyl basynda Dımash Qūdaıbergen ūstaǵan dombyra qabyldansa, aldaǵy uaqytta Portugalıyanyń ūlttyq muzykalyq aspaptaryn qorǵa alu josparlanǵan. Qazírgí tańda muzeı qorynda álemníń 50-ge juyq ūlttyń myńnan astam muzykalyq aspaby saqtauly tūr. Jalpy qordaǵy jádígerler sany 1330-dan asady. Olardyń qatarynda muzykalyq aspaptardan bólek sırek kítaptar, notalar men plastınkalar da bar”, - dedí bólím jetekshísí.
Mádenı kesh túngí saǵat 00:00-ge deıín jalǵasady. Al saǵat 23:00-de muzeı aldynda ashyq aspan astynda qazaq muzeı ísíníń negízín qalaushylardyń bírí - Ózbekálí Jáníbekov turaly «Dara» bıografıyalyq fılmí kórsetíledí.
* Taqyrypqa oraı
Mahmut UIGUN, Túrkıyadan kelgen qonaq:
Ūlttyq áuen jetelep ákeldí
Qazaqstannyń eń ádemí megapolısteríníń bírí – Almatyǵa dostarymyzben ekí kún būryn keldík. Bíraq búgín qalada “Muzeı túní” ótíp jatqanynan beıhabarmyz. Osy mańnan ótíp bara jatyp, kenet qazaqtyń ūlttyq aspaptarymen súıemeldengen erekshe áuendí estídík te, būl jerge soqpaı kete almadyq. Ūlttyq kıím kıgen adamdardy, ansamblderdíń oryndauyndaǵy án-kúılerdí kóríp, erekshe áser aldyq. Muzeıdíń íshíne kírgende túrkí halyqtaryna ortaq dúnıelerdí baıqap, ózímízdí bóten emes ekenímízdí taǵy bír sezíndík. Muzeıdíń syrtqy kelbetí de óte erekshe eken. Osyndaı ádemí mádenı keshtíń ústínen túskenímízge quanyshtymyz.
Gúljanat Sembaeva