2019 jyldan beri júzege asyp kele jatqan "Almaty Business – 2025" baǵdarlamasy boıynsha Almatynyń kásipkerleri jalpy somasy 52,7 mlrd teńge jeńildetilgen qarjy aldy. Bul qarjy 774 bıznes-jobany qoldap, 6 myńnan astam jumys ornyn ashýǵa múmkindik bergen. "Almaty Finance" JSHS jáne "Almaty" MQU ony jyldyq 2% jáne 6% mólsherlememen berdi. Óńirlik komýnıkasıalar qyzmetiniń baspasóz máslıhatynda "Almaty Finance" JSHS basqarma tóraǵasy Berik Qusaıynov osylaı dep habarlady.
Baǵdarlama shaǵyn jáne orta bıznesti damytyp, qarjylandyrýdy qolaıly etýdi kózdeıdi. Osy baǵdarlamamen kásipkerler 7 jylǵa deıingi merzimge jeńildetilgen nesıe ala alady. 2% mólsherleme áleýmettik jaǵynan osal toptarǵa, 6% mólsherleme qalǵan barlyq SHOB nysandaryna arnalǵan.
"Almaty Finance" beretin eń joǵarǵy nesıe – 500 mln teńge, "Almaty" MQU arqyly – 78,64 mln teńgege deıin alýǵa bolady. Ol aqsha jabdyq satyp alýǵa, shıkizat pen aınalym qarajatyn tolyqtyrýǵa, sondaı-aq, bıznestegi basqa da maqsatqa jumsalady.
Baǵdarlamada óndiristik, ınovasıalyq, eksportqa baǵyttalǵan jobalarǵa, kreatıvti ındýstrıa men shaǵyn ónerkásiptik parkterdegi bastamalarǵa kóp kóńil bólgen. Baǵdarlamany iske asyrý kezeńinde osyndaı 18 park salyndy.
Berik Qusaıynov "Almaty Business – 2025" baǵdarlamasy densaýlyq saqtaý, bilim berý, týrızm, sport, qyzmet kórsetý salasy men áleýmettik kásipkerlik baǵytyndaǵy bıznesti de qoldaıtynyn atap ótti. 2025 jyldyń 9 aıynda 70 joba qarjylandyrylyp, 9,8 mlrd teńge bólinip, 793 jumys orny ashylǵan.
52,7 mlrd teńgeniń ishindegi 25,6 mlrd teńge búdjetten bólinip, olar qaıtarymdy-revolverlik mehanızm arqyly tıimdi paıdalanyldy. Eń kóp joba Bostandyq aýdanynda (152), Alataý aýdanynda (149), Almaly aýdanynda (97) jáne Medeý aýdanynda (93) iske asty.
Jeńildetilgen qarjylandyrý alǵandardyń biri – kópir qurylymdaryn daıyndaýmen aınalysatyn "AZMK Group" kompanıalar toby. Alǵashqy 250 mln teńge transhy jańa jabdyq satyp alýǵa jumsaldy. Qazirgi kezde 230 mln teńge kólemindegi ekinshi transh ıgerilip jatyr.
"Almaty Business" baǵdarlamasyna alǵysymyz sheksiz. Biz osy baǵdarlama arqyly 6 paıyzdyq nesıe alyp, enshiles kásipornymyz – "Temir JB" JSHS úshin lazerlik jabdyq, stanoktar men avtomatty dánekerleý keshenderin satyp aldyq. Barlyq jabdyq ornatylyp, jumys istep tur. Sonyń arqasynda zaýyttyń ónimdiligi úsh ese artyp, qyzmetkerler sany 25%-ǵa kóbeıdi. Almatynyń ákimdigi men osyndaı baǵdarlamalarǵa zor alǵys bildiremiz. Olar qalanyń ónerkásibin damytýǵa, zaýyttar men basqa da kásiporyndardyń ónim sapasyn arttyrýǵa kómektesedi", – deıdi "AZMK Group" kompanıalar tobynyń ınovasıalar jónindegi dırektory Erik Jeksebaev.
Baǵdarlama Almaty qalasynyń ekonomıkasynyń turaqty damýyna úles qosyp, kásipkerlerge jańa múmkindikterge jol ashyp berip otyr.