Elimizde avtokólikterin saqtandyryp jatqan júrgizýshiler qatary artty.
Kóshti Almaty qalasynyń turǵyndary bastap tur, dep habarlaıdy aqshamnews.kz
Buǵan sońǵy jyldary jol kólik oqıǵalarynyń kúrt kóbeıýi túrtki bolyp otyr. Bıyldyń ózinde jol apatynan 9 myńǵa jýyq adam zardap shegipti. Bul ótken jyldyń sáıkes kezeńimen salystyrǵanda 65 paıyzǵa kóp.
Birikken Ulttar Uıymynyń málimetinshe, Qazaqstan – jol apaty boıynsha álemdik reıtıńte úshinshi orynda tur. Bıyl nebári 3 aıdyń ishinde 6 myń 200-den asa derek tirkelipti. Bul ótken jyldyń sáıkes kezeńimen salystyrǵanda bir jarym ese kóp. Al zardap shekkender sany 9 myńǵa jýyqtaǵan. Onyń 8 myńnan astamy aýyr jaraqat alǵan.
Osydan týra 10 jyl buryn kórsetkish 3 myń men 5 myńnyń arasynda, ıaǵnı 2,5 ese tómen bolǵan. Oqys jaǵdaılardyń kóbeıýi azamattardy jeke kólik quralyn da, ózderiniń ómirin de saqtandyrýǵa ıtermelegen syńaıly. Jol apaty – densaýlyqqa zıan keltirip qana qoımaı, qaltaǵa salmaq salatyny belgili. Al saqtandyrý arqyly temir tulpar ıeleri em-dom sharalary men avtokólikti jóndeýge ketken shyǵyndardy ótep ala alady. Qazir elimizde mundaı qyzmet kórsetetin 25 kompanıa bar.
Elimizde avtokólikti saqtandyrýdyń eki joly bar. Biri – mindetti saqtandyrý bolsa, ekinshisi – erikti saqtandyrý, ıaǵnı KASKO.
Mindetti saqtandyrý
Azamattar kóp jaǵdaıda tek alǵashqysyn tańdaıdy. Óıtkeni árbir qazaqstandyq ony rásimdeýge mindetti, ári baǵasy da arzan. Eger júrgizýshide mundaı saqtandyrý polısi bolmasa, kólik aıdaýǵa ruqsat etilmeıdi. Al ýaqyty ótip ketse, aıyppul salynady.
Alaıda mindetti bul saqtandyrýdyń ótemaqy mólsheri de shekteýli. Máselen jol apaty saldarynan adam densaýlyǵyna zaqym kelse – kompanıa 300 aılyq eseptik kórsetkish mólsherinde, ıaǵnı, 1 mıllıon 200 myń teńgege deıin ǵana tóleıdi. Al qaza tapsa – 2 myń aılyq eseptik kórsetkish kóleminde aqsha beriledi. Bul shamamen 7,9 mıllıon teńge. Atalǵan soma dene jaraqattary men kólikti jóndeýge ketetin qarajatty jabýǵa jetpeýi múmkin.
Mindetti saqtandyrý – úshinshi tulǵaǵa kelgen zalaldy ǵana óteıdi. Eger sizdiń kóligińiz órtense, urlansa, buzylsa eshqandaı kómek joq. Jol apatyna siz kináli bolsańyz, ótemaqy tipti berilmeıdi. Tek zardap shekken taraptyń emine jáne múlkine kelgen shyǵyn tólenedi.
Erikti saqtandyrý
Saqtandyrýdyń ekinshi túri – kólikti barlyq jaǵdaıdan keshendi saqtandyrý. Alaıda kópshilik ony erikti bolǵandyqtan elemeıdi. Mamandardyń aıtýynsha, avtokólikti 17 qaýipten saqtandyrýǵa bolady. Atap aıtsaq: órt, jarylys, jol kólik oqıǵasy, usaq buzaqylyq, urlyq, tabıǵı apat, vandalızm, taǵy da basqalary. Sondyqtan da bul saqtandyrýdyń quny shamaly qymbatyraq.
"Erikti saqtandyrý – tek jol kólik oqıǵasynan ǵana qorǵap qoımaı, avtokóligińizge burshaq túsetin bolsa, tal qulaıtyn bolsa, zilzala, jer silkinisi sıaqty tabıǵı fors-majordyń bárinen kelgen zaqymdardyń bárin tolyqtaı jabady. 80 paıyzdan astam kólikke zaqym keletin bolsa, tolyqtaı somasyn alýǵa múmkinshilik bar. Endi onyń ishinde franchaızıńtiń baǵasy – sizge tólenetin tólemnen ustalyp qalatyn aqshasy bar. Ony saqtandyrý polústarynan bilip, eń tıimdi, qolaıly jaǵyn tańdap alǵan jón", – dedi avtosarapshy Erkebulan Qulbasov.
Aıta keteıik, erikti saqtandyrýdy eń kóp tańdaıtyndar – almatylyq júrgizýshiler. Odan keıin – Almaty oblysynyń turǵyndary, úshinshi orynda – elordalyqtar tur. Al soltústik óńir men Qostanaı oblysynyń jurty bul qyzmetti sırek paıdalanatyn kórinedi.
KASKO-ny árbir tutynýshy qosymsha saqtandyrý retinde rásimdeýge quqyly. Biraq ol mindetti saqtandyrýdyń ornyna júrmeıdi. Alaıda sońǵy jyldary eki polısti de birge alǵan azamattardyń qatary artqan. Bul - kólik ıeleri qandaı jaǵdaıǵa tap bolsa da, kez kelgen shyǵynnyń óteletinine kepildik beredi. Dese de, jazataıym jaǵdaıdan saq bolaıyq!