2026 jyly Almaty qalasy Mýzeıler birlestigine qarasty "Raıymbek batyr" zamanaýı mýzeılendirilgen memorıaldyq kesheni ashylady. Bul týraly Óńirlik komýnıkasıalar qyzmetinde ótken brıfıńte Almaty qalasy Mádenıet basqarmasynyń basshysy Danıar Alıev málimdedi.
Keshen tarıhı tulǵanyń ómiri men erligin zamanaýı formatta kórsetýge arnalǵan mýzeılendirilgen keńistik retinde jobalanyp jatyr.
Keshenniń negizgi quramdas bólikteri:
- Raıymbek batyrǵa arnalǵan eskertkish: tarıhı tulǵanyń beınesin zamanaýı sáýlet stılinde kórsetý, onyń erlikterin jáne batyrlyq dástúrin dáripteý.
- Ekspozısıalyq zaldar: batyrdyń ómir joly, jaýyngerlik erlikteri jáne tarıhı dáýirin sıpattaıtyn ınteraktıvti kórmeler. Qonaqtar mýltımedıalyq beıneler, 3D-modelder jáne tarıhı rekonstrýksıa arqyly batyrdyń ómirine kóz jetkize alady.
- Bilim berý jáne mádenı keńistikter: arnaıy zaldar, master-klasstar, leksıalar men semınarlar úshin ınteraktıvti oryndar. Munda jas urpaqqa patrıottyq tárbıe berýge, batyrlyq dástúrlerdi nasıhattaýǵa arnalǵan arnaıy baǵdarlamalar qarastyrylǵan.
- Vırtýaldy jáne mýltımedıalyq jobalar: kelýshiler VR-týrlar arqyly tarıhı shaıqastarǵa qatysa alady, vırtýaldy kórmeler jáne ınteraktıvti prezentasıalar arqyly Qazaqstannyń mádenı murasyn zertteı alady.
Memorıaldyq keshenniń negizgi maqsaty – óńir tarıhyn, qazaq halqynyń mádenı jáne rýhanı murasyn halyqqa qoljetimdi, qyzyqty jáne bilimdi formatta usyný. Keshen týrıser men qala turǵyndaryna rýhanı tájirıbe berip, Almatyny elimizdiń mádenı jáne tarıhı týrızminiń ortalyǵyna aınaldyrýǵa atsalysady.
Sonymen qatar, Almaty qalasynda "Observatorium" mýzeıi ashylady. Aýmaǵy 130 sharshy metrdi quraıtyn bul mýzeı ǵylymdy, astronomıany jáne zamanaýı tehnologıalardy nasıhattaýǵa baǵyttalǵan. Munda kelýshiler:
- Ǵarysh pen astronomıalyq qubylystardy zertteýge arnalǵan ınteraktıvti ekspozısıalar;
- Bilim berý zerthanalary jáne ǵylymı tájirıbelerdi qolmen oryndaý múmkindigi;
- Ǵylymı kórsetilimder, mýltımedıalyq ınstallásıalar jáne vırtýaldy sımýlásıalar arqyly bilim alý;
- Zamanaýı tehnologıalardy, robototehnıka jáne fızıka zańdylyqtaryn qoljetimdi ári qyzyqty formatta meńgerý múmkindigine ıe bolady.
Bul eki jańa mádenı jáne ǵylymı oryn Almaty qalasyn tek týrısik emes, sonymen qatar bilim men ǵylym ortalyǵy retinde tanymal etýge zor múmkindik beredi. Mýzeıdiń qorytyndy bóligin teleskop arqyly juldyzdy aspan men planetalardy tikeleı baqylaýǵa bolatyn tiri baqylaý keńistigi quraıdy. Bul aımaq adam men sheksiz Ǵalam arasyndaǵy fılosofıalyq baılanysty sezinýge múmkindik beredi.
"Observatorium" mýzeıinde jasandy ıntellekt tehnologıalaryn engizý, sonyń ishinde "Ǵalam boıynsha VR-saıahat" ınteraktıvti jobasyn iske qosý jáne robot-ekskýrsovodty engizý josparlanýda.
Danıar Alıev, Almaty qalasy Mádenıet basqarmasynyń basshysy:
"Raıymbek batyr kesenesi men Observatorium mýzeıi – bul tek týrısik nysandar ǵana emes, olar – bizdiń tarıhymyzdy, mádenıetimizdi jáne ǵylymdaǵy jetistikterimizdi keleshek urpaqqa jetkizýdiń jańa tásili. Kelýshiler osy jerden rýhanı jáne ıntellektýaldy tájirıbe alady".