Almatyda kóppáterlí tūrǵyn úılerge qyzmet kórsetetín basqaru ūıymdary shatyrlardy, mańdaıshalardy jáne ortaq múlíkke jatatyn ózge de qūrylymdardy qar men mūzdan uaqytyly tazalauǵa míndettí. Būl turaly qalalyq Kommunaldyq ınfraqūrylym jáne tūrǵyn úı ınspektsıyasy basqarmasynyń ókílderí aıtty.
Qoldanystaǵy zańnamaǵa jáne ortaq múlíktí kútíp ūstau shyǵyndaryn esepteu ádístemesíne sáıkes, kondomınıum nysandaryn basqaru ūıymdarynyń, onyń íshínde MIB, PIK jáne basqarushy kompanıyalardyń qūzyretíne tūrǵyn úıler men oǵan írgeles aumaqtardyń tıístí sanıtarlyq árí tehnıkalyq jaǵdaıyn qamtamasyz etu jatady.
Míndettí jūmystar tízbesíne aulalardy kútíp ūstau, qar men mūzdy tazalau, shatyrlar men mańdaıshalardy jáne ortaq múlíktíń basqa da qūrylymdaryn mūz qūrsauynan aryltu kíredí. Būl sharalar tūrǵyndardyń qauípsízdígín qamtamasyz etuge jáne jazataıym jaǵdaıdyń aldyn aluǵa baǵyttalǵan.
Atalǵan jūmystardy oryndau kezínde qauípsízdík talaptaryn saqtau erekshe mańyzǵa ıe. Tazalau barysynda qauíptí aumaqtar eskertu lentasymen qorshalyp, tūrǵyndar aldyn ala habardar etíluge tıís. Sondaı-aq barlyq jūmys qauípsízdík tehnıkasy talaptaryna saı júrgízíluí qajet.
Ortaq múlíktí tıísínshe kútíp ūstamau, onyń íshínde qar men mūzdy uaqytyly tazalamau úshín jauapkershílík basqaru ūıymynyń tóraǵasyna nemese qyzmet kórsetushí ūıymǵa júkteledí. Zıyan keltírílgen nemese dauly jaǵdaı tuyndaǵan shaqta tūrǵyndar óz qūqyǵyn zańnamada belgílengen tártíppen, onyń íshínde sot organdaryna júgínu arqyly qorǵauǵa qūqyly.
Basqarma ókílderí qys mezgílínde shatyrlar men aulalardy uaqytyly tazalau tūrǵyn úılerdí kútíp ūstaudyń mańyzdy bólígí ekenín atap óttí. Būl – tūrǵyndardyń qauípsízdígín qamtamasyz etíp, tótenshe jaǵdaılardyń aldyn aludyń negízgí sharalarynyń bírí.
