Almaty qalasynda Konstıtutsıyalyq komıssıya múshelerí №5 qalalyq auruhananyń eńbek ūjymymen kezdesu ótkízdí. Ashyq dıalog alańy formatynda ūıymdastyrylǵan jıynǵa 80-ge juyq qyzmetker qatysty.
Kezdesuge Almaty qalasy Máslıhatynyń tóraǵasy, qalalyq koalıtsıya jetekshísí Meıírjan Otynshıev, Fılosofıya, sayasattanu jáne díntanu ınstıtuty dırektory Aıgúl Sáduaqasova, A.Baıtūrsynūly atyndaǵy Tíl bílímí ınstıtuty dırektory Anar Fazyljan jáne Almaty qalasy Máslıhatynyń deputaty Aıgúl Shalbaeva qatysty.
Ís-shara barysynda konstıtutsıyalyq reformalardyń negízgí baǵyttary keńínen talqylandy. Spıkerler reformalardyń mání men mańyzyna toqtalyp, olardyń densaulyq saqtau salasyna yqpaly jónínde bayandady. Ásírese, azamattardyń áleumettík qūqyqtaryn qorǵau, medıtsınalyq qyzmet sapasyn arttyru, sala qyzmetkerleríníń mártebesín kóteru máselelerí nazarǵa alyndy.
– №5 qalalyq auruhana –mamandandyrylǵan klınıka. Sayası júıení keshendí jańǵyrtuǵa baǵyttalǵan bastamany medıtsına qyzmetkerlerímen talqylau mańyzdy. 6 aı būryn qūrylǵan jūmys tobynyń jūmysyna sáıkes Konstıtutsıyanyń 84%-yn ózgertuge tura keldí. Ózgeríster mazmūndyq tūrǵyda pysyqtalyp, jobalyq negízge engízíldí. Áleumet pen sayasat úshín 145 deputattan tūratyn bír palataly parlamenttíń mańyzy zor. Al medıtsına qyzmetkerleríníń ómírí men kásíbılígín qorǵau 27-bapta qarastyryldy. Jańa Ata zań bárímízge ortaq jauapkershílík júkteıdí, referendumda kúsh bíríktíruge shaqyramyn, – dedí Almaty qalasy Máslıhatynyń tóraǵasy, qalalyq koalıtsıya jetekshísí Meıírjan Otynshıev.
Fılosofıya, sayasattanu jáne díntanu ınstıtuty dırektory Aıgúl Sáduaqasova medıtsına qyzmetkerleríníń eńbegíne aıryqsha toqtaldy.
– Densaulyq saqtau salasy – kez kelgen memlekettíń áleumettík tūraqtylyǵy men adamı kapıtalynyń negízgí tíregí. Medıtsına qyzmetkerlerí kásíbı míndetín atqaryp qana qoımaı, qoǵam aldyndaǵy úlken jauapkershílíktí arqalap júr. Ásírese sońǵy jyldary dárígerler men orta buyn mamandarynyń eńbegí aıqyn kóríndí. Olar táulíkpen jūmys ístep, adam ómírín saqtap qalu jolynda janqıyarlyq tanytty. Sondyqtan sala mamandarynyń qūqyqtyq qorǵaluy, áleumettík mártebesí jáne kásíbı bedelí de nazardan tys qalmauy tıís, – dedí Aıgúl Sáduaqasova.
Auruhana ūjymy óz kezegínde praktıkalyq tájírıbege negízdelgen ūsynystaryn bíldíríp, densaulyq saqtau júıesín jetíldíruge qatysty píkírlerín ortaǵa saldy. Ashyq formattaǵy kezdesu erkín oı almasuǵa múmkíndík beríp, ózektí máselelerdí tíkeleı talqylauǵa jaǵdaı jasady.
Jıyn sońynda aıtylǵan ūsynystar jınaqtalyp, keleshekte myqtap qolǵa alynatyny jetkízíldí.
