Almatyda jańa Salyq kodeksíníń ótpelí erejesín túsíndíríp, bıylǵy 1 qańtardan bastap qoldanysqa engen arnauly salyq rejımí turaly aıtyldy. Óńírlík kommunıkatsıyalar qyzmetínde ótken baspasóz konferentsıyasy osy taqyrypqa arnaldy. Onda Almaty qalasyndaǵy Memlekettík kíríster departamentíníń basshylyǵy ózín-ózí jūmyspen qamtyǵandar, shaǵyn bıznes pen sharua qojalyqtary úshín qandaı ózgerís bolatynyn jáne ótpelí kezeńde salyq tóleushíler není eskeruí kerektígín jan-jaqty túsíndíríp berdí.
Jańa Salyq kodeksí engízílgenge deıín Qazaqstanda jetí arnauly salyq rejımí qoldanyldy, olardyń qatarynda patent, mobıldí qosymsha, ońaılatylǵan deklaratsıya, tírkelgen shegerím, bólshek salyq pen auyl sharuashylyǵy tauaryn óndírushílerge arnalǵan jekelegen rejımder boldy. 2026 jyldan bastap júıe ońtaılandyrylady: ózín-ózí jūmyspen qamtyǵandar úshín, ońaılatylǵan deklaratsıya negízíndegí rejım men sharua qojalyqtaryna arnalǵan úsh arnauly salyq rejımí ǵana qalady. Ózgerísterdíń maqsaty – salyq saludy túsíníktí etu, ákímshílík júktemení azaıtyp, áleumettík qorǵauǵa qoljetímdílíktí barynsha keńeıtu.
Ózín-ózí jūmyspen qamtyǵandarǵa arnalǵan jańa arnauly salyq rejımín jeke kásípker retínde tírkelmegen, jaldamaly jūmys kúshín paıdalanbaıtyn jáne rūqsat etílgen qyzmetpen aınalysatyn, tabysy az Qazaqstan azamattary men qandastar qoldana alady. Aılyq tabys 300 AEK-ten (shamamen 1,3 mln teńge) aspauy tıís. Būl rejım boıynsha jeke kásípker retínde tírkelu talap etílmeıdí, salyqtyq eseptílík tapsyrylmaıdy, jeke tabys salyǵynyń mólsherlemesí 0 paıyz deńgeıínde belgílengen.
«Ózín-ózí jūmyspen qamtyǵandarǵa arnalǵan jańa rejım barynsha jeńíldetílgen jáne tabysy az árí tūraqsyz azamattarǵa baǵyttalǵan. Jalǵyz míndetteme – tabystyń 4 paıyzy mólsherínde áleumettík tólemderdí tóleu. Būl zeınetaqy júıesín, medıtsına men áleumettík saqtandyrudy qoljetímdí etedí. Būl ózín-ózí jūmyspen qamtudy zańdastyru men azamattardyń qūqyqtaryn qorǵau jolyndaǵy mańyzdy qadam», – dep túsíndírdí Almaty qalasy Memlekettík kíríster departamentíníń jeke kásípkerler men jeke tūlǵalardy ákímshílendíru basqarmasynyń basshysy Nūrlybek Ospanov.
Ózín-ózí jūmyspen qamtyǵandardyń barlyq operatsıyalary arnauly mobıldí qosymsha arqyly júrgízíledí. Onda chekter qalyptastyrylady, tabysy esepke alynyp, áleumettík tólemder avtomatty túrde esepteledí. Internet-platformalar arqyly jūmys ísteıtínder úshín jarnalardy platformalar operatorlary audarady. Baılanys qoljetímsíz eldímekenderde míndettemeler aı qorytyndysy boıynsha oryndalady.
Shaǵyn jáne orta bıznes úshín ońaılatylǵan deklaratsıya negízíndegí arnauly salyq rejımí saqtalyp, jańartyldy. Ony jyldyq tabysy 600 myń AEK-ke deıín (shamamen 2,6 mlrd teńge) bolatyn, qyzmet túrí tyıym salynǵan tízbege kírmeıtín salyq tóleushíler qoldana alady. Rejım jeke tabys salyǵy nemese korporatıvtík tabys salyǵy boıynsha 4 paıyz bíryńǵaı mólsherlemení, qosylǵan qūn salyǵy men áleumettík salyqtan bosatudy, sondaı-aq deklaratsıyany jylyna ekí ret tapsyryp, salyqty ekí ret tóleudí kózdeıdí.
«Bíz ońaılatylǵan deklaratsıyany saqtap qaldyq, bíraq ony bıznes úshín ıkemdírek árí qolaıly ettík. Tabys shegíníń joǵary boluy kásípkerlerge bıznestí bólshektemeı ósíruge múmkíndík beredí, eńbekaqy qoryn eskeru múmkíndígí resmı jalaqy tóleudí jáne jūmyspen qamtudy zańdastyrudy yntalandyrady», – dedí Almaty qalasy Memlekettík kíríster departamentíníń memlekettík qyzmetter basqarmasynyń basshysy Baqtygúl Seıítova.
Sharua qojalyqtary úshín arnauly rejımdí qoldanu tártíbí negízínen saqtaldy. Bíryńǵaı jer salyǵy joıylǵannan keıín mūndaı qojalyqtar būrynǵy mólsherleme boıynsha – tabystyń 0,5 paıyzy kólemínde jeke tabys salyǵyn tóleı beredí. Olar múlík salyǵy, kólík salyǵy, QQS jáne áleumettík salyqty qosa alǵanda bíraz salyq túrínen bosatylady, eseptílíktí jylyna bír ret tapsyrady. Salyq tóleu auyl sharuashylyǵy óndírísíníń mausymdylyǵyn eskere otyryp, jylyna ekí ret júzege asyrylady.
Baspasóz konferentsıyasynda jańa rejımderge kóshu tártíbí de túsíndíríldí. Ońaılatylǵan deklaratsıyany qoldanu úshín 2026 jylǵy 1 nauryzǵa deıín salyq tóleushíníń kabınetí, E-Salyq Business qosymshasy, banktíń mobıldí qosymshasy nemese qaǵaz nysan arqyly habarlama beru qajet. Áıtpese, salyq tóleushí avtomatty túrde jalpyǵa bírdeı belgílengen rejımge auystyrylady. Būryn patent nemese mobıldí qosymsha arqyly jūmys ístegen ózín-ózí jūmyspen qamtyǵandar basqa rejımdí tańdamaǵan jaǵdaıda jeke kásípker retínde tírkeuden avtomatty túrde shyǵarylady. Sharua qojalyqtaryn habarlama bermeı-aq avtomatty túrde kóshíredí.
«Ótpelí kezeń salyq tóleushíler jańa erejelerge sabyrmen árí artyq qıyndyqsyz beıímdeluí úshín qarastyrylǵan. Salyq salu rejımín uaqytyly anyqtap, qajet bolǵan jaǵdaıda habarlama beru mańyzdy. Barlyq ózgeríster rásímderdí jeńíldetuge jáne anaǵūrlym túsíníktí árí ádíl salyq júıesín qalyptastyruǵa baǵyttalǵan», – dep atap óttí departamentte.
Almaty qalasy boıynsha Memlekettík kíríster departamentínde kásípkerler men ózín-ózí jūmyspen qamtyǵan azamattardy jańa talaptarmen aldyn ala tanysyp, tıístí salyq rejımíne kóshu úshín qoljetímdí tsıfrlyq servısterdí paıdalanuǵa shaqyrdy.
