Qazaq ulttyq qyzdar pedagogıkalyq ýnıversıtetinde «Balancing Act: kóshbasshy, kásipker áıel – qoǵam beınesi» atty dóńgelek ústel aıasynda Stýdenttik emhana men Bıznes habtyń saltanatty túrde ashylý rásimi ótti.
Stýdenttik emhananyń qyzyl lentasyn Qazaqstan Respýblıkasy Parlamenti Májilisiniń Áleýmettik-mádenı damý komıtetiniń hatshysy Nurgúl Taý, Astana qalasyndaǵy Line Brew meıramhanalar jelisi men The Veil qonaq úıiniń bas dırektory Jaqýpova Gúlmıra jáne QyzPU-dyń Basqarma Tóraǵasy – Rektory Gúlmıra Ámirhanqyzy Qanaı kesti.
Zamanaýı tehnıkamen jabdyqtalǵan bul emhananyń basty maqsaty – ujymnyń densaýlyǵyn nyǵaıtý jáne stýdentterge sapaly medısınalyq qyzmet kórsetý. Jańa ortalyq stýdentterdiń oqý úderisine barynsha qolaıly jaǵdaı jasap, aýrýshańdyqtyń aldyn alý jáne densaýlyq kórsetkishterin jaqsartýǵa baǵyttalǵan.
«Elimizdiń túkpir-túkpirinen kelip, bilim alyp jatqan qyzdarymyzdyń densaýlyǵyn saqtaý jáne nyǵaıtý maqsatynda ýnıversıtet qabyrǵasynda emhana ashtyq. Bul – jastarymyzǵa alǵashqy medısınalyq kómek kórsetýge arnalǵan arnaıy ortalyq. Emhanada tis dárigeri, qyzdardyń reprodýktıvtik densaýlyǵyn nyǵaıtý maqsatynda akýsher-gınekolog, sondaı-aq jalpy tájirıbelik dárigerler jumys isteıdi. Biz qyzdarymyzǵa barynsha yńǵaıly jaǵdaı jasaýǵa tyrysyp jatyrmyz. Medısınalyq kómekke qajettilik týyndaǵan jaǵdaıda, olar bizdiń emhanadan barlyq qajetti qyzmetti ala alady», – dedi «Almaty Clinic» medısınalyq ortalyǵynyń dırektory Kýsaınova Dına Týrgýnbaıqyzy.
Bıznes habtyń qyzyl lentasyn «Atameken» UKP Shaǵyn kásipkerlikti jáne halyqaralyq yntymaqtastyqty damytý jónindegi dırektor orynbasarynyń mindetin atqarýshy Tórebekova Janar Meıramqyzy, Astana qalasyndaǵy Line Brew meıramhanalar jelisi men The Veil qonaq úıiniń bas dırektory Jaqýpova Gúlmıra kesti. Bıznes hab stýdentter men jas kásipkerler úshin jańa tanystyqtar ornatýǵa, tyń ıdeıalar men paıdaly kezdesýler ótkizýge arnalǵan alań bolmaq. Bul bastama qyzdardyń kóshbasshylyq qasıetterin damytýǵa yqpal etip, kásipkerlik pen bilim áleminde ózindik orny bar jańa býynnyń qalyptasýyna jol ashady.
«Búgingi kún bizdiń ýnıversıtet úshin erekshe. Ýnıversıtetimizde Bıznes hab ashyldy. Bul stýdentterimiz úshin zor múmkindik, kásipkerlikke jol ashatyn jańa qadam. Munda túrli motıvasıalyq kezdesýler, sheberlik sabaqtary jáne kásipkerlikke baǵyttalǵan kýrstar uıymdastyrylady. Osy baǵytta aıanbaı eńbek etip, jastardyń qabiletin damytýǵa bar kúshimizdi salamyz», – dedi Qyzdar kóshbasshylyǵy men kásipkerlik ortalyǵynyń bólim basshysy Bekqalıeva Gúlzıra Maqzumqyzy.
Ashylý rásiminen keıin «Balancing Act: kóshbasshy, kásipker áıel – qoǵam beınesi» atty dóńgelek ústelde tyń ıdeıalar usynylyp, qatysýshylar ózara pikir almasty. Kezdesý sońynda ýnıversıtettiń Basqarma Tóraǵasy – Rektory Gúlmıra Qanaı qyzdarǵa qoldaý men demeýshilik kórsetken seriktes uıymdarǵa jáne barsha qatysýshylarǵa alǵysyn bildirip: «Sanaly urpaq qalyptastyrý jolyndaǵy birlese otyryp jasap jatqan eńbegimiz aqtala bersin», – dedi.