Óńírlík kommunıkatsıyalar qyzmetí alańynda ótken baspasóz konferentsıyasynda Almaty qalasy Sport basqarmasynyń basshysy Darhan Nūrhanūly beıímdí sportty damytu men erekshe qajettílígí bar adamdardyń dene shynyqtyrumen aınalysuyna jaǵdaı jasau turaly bayandady.
Almatyda beıímdí sport «Almaty» sport klubynyń bazasynda damyp jatyr. Būl qaladaǵy osyndaı jalǵyz memlekettík mamandandyrylǵan klub. Qazír mūnda densaulyǵynda kínáraty bar 756 sportshy jattyǵady eken.
8 bólímshe jūmys ísteıtín klubta paralımpıadalyq, surdlımpıadalyq, ūlttyq jáne ınklyuzıvtí baǵyttardy qosa alǵanda, sporttyń 23 túrí bar. Barlyǵyn bílíktí mamandar jattyqtyrady, sabaqtary da tegín ótedí.
2025 jyldyń qorytyndysy boıynsha «Almaty» klubynyń sportshylary joǵary nátıje kórsettí. Olarǵa 438 sporttyq ataq berílíp, ártúrlí deńgeıdegí 48 jarysta 462 medal jeńíp alǵan. Jalpy medal qorjynynda 180 altyn, 142 kúmís pen 140 qola júlde bar. Būl júıelí jūmystyń arqasy.
Mańyzdy oqıǵanyń bírí – klubtyń 12 ókílíníń Tokıoda ótken XXV jazǵy Surdlımpıada oıyndaryna qatysuy boldy. Būl jarysta almatylyq sportshylar 2 kúmís pen 2 qola medal jeńíp alyp, qalamyz ben elímízdí halyqaralyq arenada álemge áıgílep, laıyqty túrde tanytyp qaıtty.
Almatyda beıímdí sportty odan árí damytu maqsatynda Almaty qalasynyń ákímíníń tapsyrmasymen Raıymbek dańǵyly, 312 mekenjaıynda ınklyuzıvtí sport ortalyǵy da salyna bastady. 21 sport túríne arnalǵan Sport keshení bír auysymda 100 adamǵa deıín qabyldaıdy.
Jobanyń júzege asuy paralımpıadalyq, surdlımpıadalyq jáne ınklyuzıvtí sportpen aınalysu múmkíndíkterín edáuír keńeıtíp, barlyq sanattaǵy sportshylarǵa jaǵdaı jasap, teń múmkíndík beredí.
Sondaı-aq 2017 jyldan berí Almatyda autızmníń belgísí bar balalarǵa arnalǵan tau shańǵysymen beıímdí syrǵanau jobasy da júzege asyp kele jatqany aıtyldy. Būl joba qazír tūraqty sūranysqa ıe bolyp otyr.
Sabaqtar balalardyń qımyl-qozǵalys úılesímdílígín, áleumettenu daǵdylaryn jáne ózíne degen senímdílígín damytuǵa kómektesíp, olardyń jan-jaqty damuy úshín qauípsíz árí qoldaushy orta qalyptastyrady.
Sóz sońynda Darhan Nūrhanūly beıímdí sportty damytu Almatynyń ınklyuzıvtí jáne qoljetímdí sporttyq keńístígín qalyptastyruǵa baǵyttalǵan sport sayasatyndaǵy basym baǵyt bolyp qala beretínín atap óttí.