Almaty qalasynyń ákímí Darhan Satybaldy 1981 jyldan berí jahandyq tehnologıyalyq trendterdí qalyptastyryp kele jatqan, álemdegí eń írí tehnologıyalyq kórme – GITEX-tíń ǵalamdyq ūıymdastyrushysy inD kompanıyasynyń ókílderí Trıksı Lo Mırmand pen Rupert Adammen kezdestí, - dep habarlady Aqshamnews.kz.
Kezdesu barysynda Almatyda GITEX AI Central Asia & Caucasus Kazakhstan kórmesín ótkízu máselelerí jáne ony ūıymdastyrudyń naqty qadamdary talqylandy. Qala ákímí atap ótkendeı, Almaty brendtíń Ortalyq Azıyaǵa enu núktesíne aınalyp, halyqaralyq yntymaqtastyqty keńeıtuge, ınvestıtsıya tartuǵa jáne tehnologıyalyq startaptardy ílgeríletuge jańa múmkíndík ashady.
«Almaty óńírdegí jetekshí IT-hab retínde ózín áldeqashan tanytty: mūnda tehnologıyalyq kompanıyalar, halyqaralyq ortalyqtar shoǵyrlanǵan jáne belsendí startap-ekojúıe qūrylǵan. GITEX forumyn ótkízu būl jetístíkterdí halyqaralyq deńgeıde tanystyruǵa jáne qalaǵa jańa seríktester men ınvestorlardy tartuǵa múmkíndík beredí», – dedí Darhan Satybaldy.
Onyń aıtuynsha, ınfraqūrylymdy daıyndau máselesíne erekshe nazar audarylǵan. Atap aıtqanda, «Atakent» QÍYO alańyn jańǵyrtu, logıstıkany ūıymdastyru jáne barlyq tartylǵan qyzmetterdíń úılesímdí jūmysyn qamtamasyz etu kózdelgen. Almaty ákímí salalyq basqarmalarǵa ūıymdastyrushylarmen bírlesíp, daıyndyqtyń egjeı-tegjeılí josparyn ázírlep, onyń naqty oryndaluyn qamtamasyz etudí tapsyrdy.
inD kompanıyasynyń bas dırektory, GITEX-tíń ǵalamdyq ūıymdastyrushysy Trıksı Lo Mırmand óz sózínde:
«Almaty Europa men Azıya toǵysyndaǵy mańyzdy ınnovatsıyalyq ortalyqtardyń bíríne aınalyp keledí. Būl – Qazaqstannyń tsıfrlyq jáne jasandy ıntellekt baǵytyndaǵy ambıtsıyalary naqty ekonomıkalyq ınfraqūrylymǵa ūlasatyn qala. GITEX osy úderístí jedeldetu úshín asa qolaıly kezeńde kelíp otyr. Būl óńírdíń tehnologıyalyq áleuetín, ınvestıtsıyalyq tartymdylyǵyn jáne jahandyq baılanysyn kúsheıtedí. Nátıjesínde aımaq jasandy ıntellektke negízdelgen jańa ekonomıkanyń mańyzdy qatysushysy retínde ornyǵady», – dep atap óttí.
Onyń aıtuynsha, 45 jyldan astam uaqyt íshínde GITEX úkímetter, korporatsıyalar, startaptar, ınvestorlar jáne tehnologıyalyq ekojúıeníń negízgí oıynshylary arasynda senímdí seríktes retínde halyqaralyq bedelge ıe bolyp, álemdegí eń írí tehnologıyalyq ís-sharalar brendíne aınaldy.
Búgínde GITEX 14 qala men elde, sonyń íshínde Abu-Dabı, Dubaı, Brazılıya, Egıpet, Germanıya, Qazaqstan, Kenıya, Marokko, Nıgerıya, Serbıya, Sıngapur, Túrkıya jáne Vetnamda ótkízíledí.
GITEX AI Central Asia & Caucasus Kazakhstan kórmesí Almatyda 2026 jyly 4–5 mamyr kúnderí ótedí. Ís-sharaǵa álemníń ár túkpírínen startaptar, ınvestorlar jáne memlekettík qūrylymdardyń ókílderí qatysady. Kórmeníń ótkízíluí qala men búkíl óńír úshín mańyzdy oqıǵaǵa aınalyp, tehnologıyalyq salanyń damuyna, halyqaralyq áríptestíktí nyǵaıtuǵa jáne ınnovatsıyalyq ekonomıkany qūruǵa qosymsha serpín beredí.
2026 jylǵy ekspozıtsıya úsh basym baǵytqa shoǵyrlanady: jasandy ıntellekt (tehnologıyalardy qalalyq orta men bızneske ıntegratsıyalau), GovTech (Qazaqstannyń tsıfrlyq memlekettík qyzmetter salasyndaǵy jetístíkterín tanystyru), kıberqauípsízdík (derekterdí jáne būlttyq esepteulerdí qorǵau sheshímderí), sondaı-aq ís-sharanyń qala ekonomıkasyna yqpaly (jyljymaıtyn múlík, valyuta jáne ınvestıtsıyalar) qarastyrylady.
