2025 jyly zoobaqta 31 túrlí januardan 87 tól dúnıege keldí. Sondaı-aq, zoobaq kollektsıyasy jyl saıyn jańa jáne sırek kezdesetín bızon, tamandua, tsıveta, geneta, agama sıyaqty túrlermen tolyqtyryldy. Būl turaly Óńírlík kommunıkatsıyalar qyzmetínde ótken brıfıngte Almaty qalasy Mádenıet basqarmasynyń basshysy Danıyar Alıev málímdedí.
Búgíngí tańda Almaty haıuanattar baǵy – Qazaqstandaǵy eń kóne jáne bedeldí zoobaqtardyń bírí. Aumaǵy 21 gektardy qamtıtyn haıuanattar baǵynda qazírgí uaqytta 385 túrge jatatyn 4000-nan astam januar, qūs jáne bauyrymen jorǵalaushylar bar. Olardyń 76 túrí Halyqaralyq tabıǵatty qorǵau odaǵynyń qauípsízdík tízímíne, al 24 túrí Qazaqstan Respublıkasynyń Qyzyl kítabyna engízílgen.
"2025 jyly zoobaqqa kelushíler sany 1,2 mıllıon adamǵa jettí. Būl bízdíń zoobaqtyń eldegí jáne aımaqtaǵy tanymaldyǵyn aıqyn kórsetedí. Jyl saıyn kelushíler sanynyń ósuí – bízdíń jūmystarymyzdyń jáne tabıǵatty qorǵau mıssıyamyzdyń kórínísí", - dedí basqarma basshysy Danıyar Alıev.
2025 jyly Almaty haıuanattar baǵy Europalyq zoobaqtar men akvarıumdar qauymdastyǵynyń tolyqqandy múshesí retínde qabyldandy. Būl mártebe zoobaqtyń halyqaralyq standarttarǵa saı ekenín, januarlardy qorǵau jáne ǵylymı zertteulerde jańa múmkíndíkterge qol jetkízetínín rastaıdy.
Almaty haıuanattar baǵy bıyl auqymdy rekonstruktsıyadan ótedí. Jobanyń maqsaty – kelushílerge yńǵaıly, zamanauı jáne bílím beru tūrǵysynan baı tájírıbe ūsynu. Jobanyń ayaqtaluymen zoobaq jylyna 2 mıllıonǵa deıín adamdy qarsy ala alady.
Almaty haıuanattar baǵy – tabıǵatqa degen súıíspenshílíktí arttyratyn, balalar men eresekterge bílím men áser qaldyratyn erekshe oryn. Jańa kezeńde zoobaq tek Almatynyń ǵana emes, búkíl Ortalyq Azıyanyń eń írí jáne zamanauı ortalyǵyna aınaluy kútílude.