Vıse-mınıstr densaýlyq saqtaý júıesindegi jalaqy máselesine qatysty pikir bildirdi, - dep habarlaıdy Aqshamnews.kz tilshisi.
Densaýlyq saqtaý vıse-mınıstri Tımýr Muratov áleýmettik jelide patologoanatomnyń tómen jalaqy jaıly jazbasyna qatysty pikirin bildirdi. Onyń aıtýynsha, qazaqstandyq dárigerlerdiń eńbekaqysy rasynda da jetkiliksiz.
"Dárigerler az alady. Álemde klınıkalyq medısına eń joǵary aqy tólenetin salalardyń biri. Biraq eldegi qazirgi ekonomıkalyq jaǵdaıdy eskerýimiz kerek. Ókinishke qaraı, budan artyq deńgeıde qamtamasyz ete almaı otyrmyz", – dedi Muratov Úkimettegi brıfıńte.
Vıse-mınıstrdiń aıtýynsha, aýrýhanalar men emhanalar aqysyz medısınalyq kómektiń kepildi kólemine kirmeıtin jáne ÁMSQ arqyly ótelmeıtin qosymsha aqyly qyzmetter kórsetý arqyly qosymsha tabys taba alady.
"Mysaly, bosanýshy áıelder naqty dárigerdi tańdaýdy qalasa, bul – aqyly servıs. Túsken qarajat mekemede qalmaıdy, qyzmetkerlerge dıfferensıaldy tólem nemese syıaqy retinde beriledi", – dep túsindirdi ol.
Sondaı-aq Muratov dárigerlerdiń aılyq deńgeıi mindetti medısınalyq saqtandyrý júıesine tikeleı táýeldi ekenin atap ótti.
"Jumys berýshi men qyzmetkerdiń jarnalary joǵary elderde, mysaly, Ońtústik Koreıada, dárigerlerdiń jalaqysy da aıtarlyqtaı joǵary", – dedi vıse-mınıstr.
Onyń málimetinshe, Qazaqstanda dárigerlerdiń medıandyq aılyǵy shamamen 400 myń teńge. Buǵan deıin mınıstr Aqmaral Álnazarova Úkimet otyrysynda dál osyndaı derek keltirgen. Al eks-mınıstr Ajar Ǵınıat 2023 jylǵa qaraı dárigerlerdiń ortasha jalaqysy 550 myń teńgege jetedi dep málimdegen edi.